用筷子食意粉？洋麵屋五右衛門

最近唔知點解越黎越多日本連鎖食店進軍香港。
繼好早好早既Pepper Lunch同Mos Burger，沉藉左一輪之後就輪到Coco壹番屋，Izumi Curry，かつや（吉豚屋），丸亀製麺，サイゼリア（Saizeria)等，而最近連洋麵屋五右衛門都浸漸香港呢個超具潛力既市場。
似乎香港人已經擺脫左311大地震既陰霾，重新對日式料理投以信心既一票！
（啊，我真係唔明點解香港就只有吉野家而冇人開松屋甚至すきや，否則將會係一大喜訊！）

講到洋麵屋五右衛門，齋睇鋪名都夠晒fusion，將洋食同五右衛門呢位人兄放埋一齊做鋪名，你會聯想到d咩？
食麵？No no no！真係一大謬誤！實情佢地係專賣意粉！
咁有咩特別啊？食意粉去意粉屋咪得lor！再唔係去食夠晒Al dente既Al Dente lor！有咩咁特別先？
話明連鋪名都fusion，又點可能冇gimmick先？
咁我問下你啦，除左你喺屋企自己食「百得阿姨」（某意粉或通粉既寶號）既時候有咁既機會之外，出街食意粉，你去邊度會係指定要你用筷子食意粉？
係啊，冇錯啊，就係洋麵屋五右衛門啦！

基於佢只係一間日本連鎖平民餐廳，就唔好奢望人佢有咩裝潢啦！
打開個menu揀返碟意粉好過啦！
冇錯！清一色意粉！不過充滿和風特式！如你會見到明太子啦...
同時你仲可以加錢轉套餐，配上一碗和風麵豉湯及沙律...
基於我個人對carbonara情有獨鐘，所以穩陣起建，食個basic野啦！
（我一直覺得如果basic都做得唔好，其他都唔況好得去邊，嗯，我深信呢個道理！）

喂！洋風系列意粉！正野！

跟餐？加錢啦！

出餐速度黎講都算真係幾快，絕對少於10分鐘！
更係啦，大大舍廚房比你望住佢煮麵，點敢揸流攤！望真d！N個鑊喺度，唔好同我講唔夠用具煮啊！咁點可能慢？！
以日式托盤連同意粉「和盤托出」，貫徹佢地fusion既宗旨，冇錯，最緊要對筷子，神髓就在於此！

Fu唔Fusion先？

色香味俱存啊！

食出個神髓！

好啦，咁到底味道如何呢？
是咁的，其實呢，我覺得carbonara係好難整到唔好食既，所以呢個咁安全既選擇係理所當然地安全！
唯獨一個問題就係似乎個汁收得唔夠乾水，忌廉汁太稀唔夠稠，明顯係煮得太快啦！
但總括黎講算得上合格之作，no other comment。
以＄7－80左右既價位黎講已經算係唔錯，如果過百既話，我諗你都可以考慮返意粉屋（笑）
不過既然咁過癮，實情真係可以一試，咪當自己食緊日本菜lor！（咁人地真係日本黎wor！）

洋麵屋五右衛門
牛頭角店: 牛頭角牛頭角道77號淘大商場3期地下G261-265號鋪
屯門店: 屯門屯順街1號屯門市廣場2期1 樓19號舖

Agura東京ラーメン

承接上一篇，今日就講下柯士甸路另一間人氣（定人龍？）拉麵店 - Agura東京ラーメン。
其實原先我都唔知呢度有間拉麵店，都係勇於嘗試既朋友們食過之後讚口不絕，於是專程走去一試。
唔食尢自可，一食就上癮，可以一個星期去兩次，直頭當左飯堂一樣！（晚晚去會破產的...）
要知道喺香港要搵間拉麵店唔難，但要搵間好食既拉麵店好難！
有邊間唔標榜自己係日本人主理？結果係點？不如數下有邊間係好食？一風堂？唔係呱...HK一風堂好食？日本一風堂就好食！
豚王？呢間就真係好食既，但因為太濃好膩，不能食太多！
咁不如「魂」呢？都ok，比豚王清淡少少，還可以，但食親都濃湯豬骨，真係好油！
咁多要求，鳥華又點啊？雞湯拉麵？史雲生？
頂！拉麵来，拉麵jo，舞心...等等...下刪N間...都唔明點解d拉麵鋪習中開喺大坑CWB...
其中不得不提有老翻「一蘭」之稱既「倉吉」，裝修格局百分百倒模一樣，但探子回報係極．度．難．食！
認真，數下好食既有幾多間？
到最後，Agura既出現終於有返d新鮮感！仲豬骨？不如試下魚介湯底啊，連怕腥唔食魚既我都覺得正，有魚香，又有濃豬骨既膠感，真係試下無妨！

呢間Agura認真唔似拉麵鋪，齋睇門面你都唔知佢食咩！
全白無菌既店面（終有一日唔再無菌，不斷比煙薰實變黃！），一眼睇晒既長條形面積，
呢間拉麵鋪只可坐最多9個人，真係速食格局，快d食完快d走！
第一次去試還未出現大人氣，所以都仲未需要排隊。
打開餐牌，麵款x3，有醬油魚介豚骨拉麵 / 鹽味魚介豚骨拉麵（係啊，mix豬骨架，都係離唔開豬骨，ai...），同埋沾麵，要食晒黎兩次已經可以。
第一次黎食先試左最basic既醬油魚介豚骨拉麵。
眼見店員淥麵時配上計時器，似乎要確保麵既成品同質量要一致兼穩定，似乎有用心研究。
而在鋪既一角，有位霸氣十足，一口流利日文既師父正用火鎗燒叉燒，望一望餐牌簡介先知原來呢位就係長谷川大師，失敬失敬！

麵上檯，先淺嚐一口湯，魚介味十足，完全唔腥，而且濃度適中帶點膠質，有意思！

麵質果然有料到，爽口彈牙，絕非坊間一d拉麵鋪煮出黎淋過海綿既拉麵！

最驚喜既都係果片叉燒，用上半肥瘦叉燒，而且非．常．香．口，兼且入口即融！

相信去一般拉麵鋪所食既果片叉燒，9成9都係「白灼」，即使香口都欠缺油香，這絕對係用火鎗去燒既逞辰原因，除左油脂香仲帶有少許濃邊既香，火喉時間剛好！

我相信短暫黎講都好難搵到一間以魚介為湯底而且仲要好好食既拉麵鋪。

醬油魚介豚骨拉麵

沾麵

每晚限量20碗既油麵，又係必食！

當然，我諗食得多魚介都會悶，如果次次都係咁樣，咁同我次次去食豬骨底有咩分別？

又唔使擔心，同鋪頭經理吹水間得知佢地不時會有d outside menu既新品。

實情到最終都會因應季節而加入menu，亦即係季節限定。

而小弟有幸試了幾款當時未推出既創新拉麵，非常新鮮！

首推適合炎炎夏日既有「蕃茄蓉麻醬冷麵」，微酸既蕃茄蓉配上麻醬，再添一點柚子汁來搭配冷麵，意外地係一種絕配！

要知道夏天咁熱仲要對住碗熱辣辣既拉麵真係影響食慾架嘛。

以冷麵掛帥沾上開胃既麻醬，非常清新，的確係夏天首選！

蕃茄蓉麻醬冷麵

同期仲有沾麵既變奏版！本身沾麵既汁都係用濃厚既灸介豬骨湯底配上叉燒粒，到底可以點椒變奏呢？

答案就係檸檬汁！將檸檬汁榨進沾麵汁，而同時送上既青檸則榨汁至叉燒面上，沾上後，意外地沾麵汁產生了變化，層次多了，可以食得出多了一份檸檬既清新感！

令整碗濃汁減磅了不少，輕身好多之外仍能保持魚介既鮮味，高招！

檸檬沾麵

試問打開餐牌眼見得果3款麵既一間鋪，你又點會諗到佢地會不斷創新，因應季節推陳出新呢？

更加新穎既，夏天未過我已有幸搶先一嚐預計會秋天推出既飯！

係啊，拉麵鋪有飯食啊，其實一d都唔奇，你去日本食下拉麵就知好多時拉麵set係跟飯架，不過佢呢碗係炒飯而唔係白飯ja，或者你去山頭火試下，一樣有麵＋飯set食到你嘔！

至於呢碗炒飯，先賣過關子吧（實情未出得街架！因為真係未有架！）

經理先生話呢碗飯係用左日本空運到港既高級日本米炒成，聽講包米1kg要幾舊水...！！！

基於嘗有非常多既改進空間，所以我都唔多講啦，遲d揭曉吧！

迷之炒飯？！

Agura東京ラーメン

尖沙咀柯士甸路15號柯士甸大廈B座地下

請注意營業時間，除左賣晒之後佢唔show你之外，佢地星期日休息架！係啊，佢地有定休日架，你吹咩？（笑）

p.s. 聽講呢間Agura既老闆，亦即係長谷川先生，係日本某上市集團既大股東，而佢同時亦都係一位設計師，所以你可以見到間鋪係有別一般拉麵鋪既格局，新潮到你以為係食新式泰

菜！（笑）

p.s.2 差d漏左講，佢地係要加一收貴架！

日本過江龍？烏骨雞拉麵 龍

估唔到個blog開左差唔多半年,到最後都係冇咩時間update...

不過稍後時間相信更新時間會比較密,敬請期待。

今次想講既仍然係日式餐廳。

近年拉麵店開到成行成市，要試盡市面上既拉麵店真係要花費相當多時間，金錢，同體重上既犧牲。

不過當中到底又有幾多間係真係好食呢？難度有「日本人坐陣」甚至「日本過江龍」為賣點既就等於好食？

早前朋友介紹位於柯士甸路既AGURA拉麵,專程一試,食過認真讚不絕口!（稍後再介紹）
當日回程時發現同街準備開一間叫做「烏骨雞拉麵 龍」既拉麵店，於是決定下次一試,睇下究竟質素如何。
直至近日原先打算再戰AGURA拉麵，搶先品嘗店方說將會推出既兩款新口味時，發現新口味未有，而且到達時發現已見人龍，於是就節省時間,去了這間「烏骨雞拉麵 龍」一試龍與鳳。

跟上次經過時情況相同，店內仍然係鬼影都冇隻，都已經開業接近兩個星期，以日本拉麵店黎講情況係咪令人擔憂?
而店員亦得閒過頭喺鋪外拉客，以「日本也有不少分店」，「款款拉麵都好食」為賣點，試圖增加店內人流。
我本著「剛開業不久人氣尚未提升」既諗法，即管膽粗粗一試。

跟AGURA一樣，店內因為是長條形關係，尚算狹窄，但係比起其他拉麵店排位稍為奇怪，
明顯想用盡店內空間吧，既然一副搭檯格局，何不以一張bar檯式排位...
燈光方面亦比較暗，睇落去就係冇厘神氣咁...
打開餐牌款式睇落好似好多，但實情上仍然離不開主流既味噌，豚骨，醬油及鹽味，新鮮感欠奉。
每一款基本上都跟隻半熟蛋及叉燒，但加量叉燒就叫多一個選擇...不如簡單點，寫住加錢加叉燒咪更空接！
店員亦都不斷作推介,基本上就係你睇到邊款佢地就推介邊款，但又講唔出推介既理由，好食及特別之處...一句到尾就係hea！
唔係想比較,但隔離AGURA就連推介都特別詳細，詳細解釋各口味的特性令你有個大概，這點的確差得很...（印象開始急轉直下...）
好啦，講到呢度都已經唔敢抱有太大期望，穩陣起建，點了一個味噌及豚骨。

當然，因為以晚飯黃金時段黎講都可以小貓都冇一隻，拉麵煮起上來都冇慢既理由吧。
幾分鐘後兩款拉麵同時上檯，先喝一口豚骨味湯底，跟坊間既以「濃味」為賣點的相比，呢度既略嫌淡口，明顯因為以烏骨雞為主之故，
但因為豚骨味比較搶，完全食唔出主打的「烏骨雞」味，不見得雞湯底為主的好處。
(個人已見，這點鳥華亦是失敗者...雞湯拉麵就係點都唔會夾...要食雞湯不如喺屋企用史雲生清雞湯煮麵食?)
配料有一大片紫菜，荀，炸洋蔥及數片「帶骨的叉燒」，我即管以豬軟骨來看待，卻不是豬軟骨般軟身，叉燒本身也欠缺油香，亦冇肉味，扣分!
（亦都有人匯報過係酸既！）
麵底本身係幼麵，食落還算爽口，挽回丁點分數...可惜整體黎講...差！

塊叉燒真係令人難以形容...

另一款味噌口味的，配料一樣，但麵底唔同，係粗身的油麵...(餐牌好似冇交代過...)
我都係講湯底算啦...反正都冇咩值得講，「推介」就更不用提...
個人向來偏向重口味，但呢個味噌湯底連重口味向既我都覺得太重...比起豚骨的可以說咸很多...再喝一口豚骨的就連豚骨湯底也覺得，味噌味去了哪? 

咸到極點！

價錢方面同隔鄰既AGURA相若，普普通通的索價$78，冇加一，只有呢點比較人道。

不過我個人意見，同街的，我諗我寧可選擇「有加一」果間較值得同好食!
翻查日本tabelog既紀錄，店員都真係冇厄人既，日本都真係有「同名鋪」但數量不太多...
再睇下日本本土既評分，以「日本人未放入口都已經大叫好食既特性」，評價都可以比普通更普通既話就知道到底係咩一回事吧...
Tabelog參考: 全国の烏骨鶏ラーメン 龍に関連するお店を探す

很失望既一餐...我諗呢間我完全冇再試既念頭..一生人中試一次就夠了...
或者因為隔鄰做得太出色，即使兩者的主打並唔一樣，但難免會作了比較，始終大家終究都係日本拉麵，即使湯底唔同仍然係拉麵...
（小說消息：聞道有食客目到呢間拉麵店既主廚係落包粉落去做湯底，似乎真材實料煲出黎呢件事唔係事實wor...情況令人擔憂...）
咁你話啦，邊個話「有日本人坐陣煮麵」，「日本過江龍」既拉麵店就係好食先?

p.s. 本來以上呢篇感想係打左落openrice分享，點知竟然會有食評唔批呢個情況！乜實話實說都有問題？

本Blog首發!吉豚屋首發!

開張大吉!

呢個BLOG一睇heading就知係咩都講一餐!簡單d講就係雜,九唔搭八! (笑)

冇計,呢個世界所有野都日新月異,加上個人好奇心作祟同埋專試新野既特性,即管開張分享下任何「開心大發現」,開心share!

最近聞說日本吉列豬扒連鎖快餐店かつや(港名為「吉豚屋」 CA-TU-YA)強勢登陸香港這個和食兵家必爭之地,於九龍灣淘花園搶灘插旗,避開了勝博殿,銀座梅林等價單較高同樣是過江龍既軍事重鎮,務求搶奪廉價吉列豬市場。

基於小弟相當熱愛日式吉列炸豬扒,留日時都不時鯨吞炸豬定食,也有一嘗かつや這間B級グルメ的ONE COIN飽肚快感,於是某日見放學就專程去香港初店一試。

既然係平野,門面都不需要花大錢裝修,非常簡單(非常有良心,唔係就平唔起啦),但比起日本的門面,我個人認為簡直可以用「靚」黎形容! (笑) 至於內部,一貫日式速食格局亦乾淨,簡單格局就係希望你食完就好走嘛(目標直指翠華翻枱率?XD)。

當晚因為時間尚早,未見人潮,空枱極多,行入鋪馬上有服務員照顧帶位,部份口講日文的都算見得人並唔係「二三四」,當然應該有部份真係日本人黎。咦?日本人駐場?加分!

(這點可緊要!當年香港一風堂有日本人駐場時,跟冇日本人駐場既質素真係差天拱地!)

打開MENU,別想種類繁多,入得黎食炸豬扒仲想有雞牛羊既就去番花園餐廳食雜扒啦!(笑) 選擇亦都係一貫既ヒレカツ及ロース,並沿用日式既SIZE分類方法,以「松」(L),「竹」(M),「梅」(S) 三種表示,唔明既話每個SIZE上亦有註明塊豬扒有幾多gram,眼見都分80g及110g等等,相當清楚,方便你「對號入座」。同時亦有日式炸豬扒既經典配搭 – 咖哩及滑蛋比你揀,夠多啦呱? (笑)

當晚叫了一份滑蛋炸豬扒飯(梅)及一份炸豬扒ロース定食,並享用定食優惠加$5加大とん汁(豚汁,即豬肉片湯,個人習慣上必飲),賣相算是不俗,份量亦頗夠大,正常食量的話已經相當足夠。

 炸豬扒ロース定食及とん汁(加大) $65 + $5

滑蛋炸豬扒飯(梅) $45

終於都輪到重點! (等左好耐啦!!!)
首先要嘉許一下米係用珍珠米,我都唔理佢係咪日本珍珠米了,佢用珍珠米感覺即時加分,馬上很日式!
再到炸豬扒,炸粉同豬扒粘連得不錯,冇鬆散或剝離既跡象,值得一讚!
而豬扒本身以$65黎講已經不錯了,將價就貨之下都沒苛求有幾靚脂肪應該幾厚又幾有脂肪甘香,至少唔係茶餐廳鬆肉粉豬扒已經收貨。
到とん汁這一環,個人反而對呢碗湯甚有expectation,可惜...味道很淡很失色...(噢...這方面好個人既 lol)

最後到服務等等,出餐速度快!至少比其他「名牌炸豬」都要快!或者入座時比較冷清之故,所以點餐後10分鐘內整個餐就出現於眼前。
下次去時倒可試一下於繁忙時間的出餐速度。
服務嘛...冷清時服務也不多,卻收服務費...唉...
不過都係果句,平有平食,比起X組的貴夾遜就已經很不錯了!

CA-TU-YA 吉列炸豬扒專門店
https://www.facebook.com/catuya.hk

日本本土網頁參考
http://arclandservice.co.jp/katsuya/